A.Shakuur-Gaalmastar: “Waxaan aad u jeclaa ciyaartoyda Diito oo NPP ka tirsanaa iyo Ronaldo oo reer Brazil ah”
Waxaanu jecelahay in aanu halkan idiinku soo gudbino waraysi khaas ah oo aanu la yeelanay Ciyaaryahan ka tirsanaan jiray kooxda Gaashaan, haddana ku sugan wadanka Hindiya oo uu wax ka barto, isla-markaana u ciyaara koox Hindi ah, waa ciyaaryahanka Cabdishakuur Gaalmastar, oo haddana u ciyaara koox ka dhisan wadanka Hindiya.
Haddaba waraysi uu Weriyahayaga Cabdiqani Xuseen Baynax khadka Isgaadhsiinta kula yeeshay isaga jooga wadanka Hindiya, oo uu kaga waramayo arrimo badan ayaanu jecelahay inaanu idiinku soo gudbino halkan isaga oo dhamaystiran, waxaana waraysigaas aadka u xiisaha badani u dhacay sidan: -
S: Goormaad bilowday ciyaarista kubadda cagta?
J: Run ahaantii ciyarista kubad cagta ilaa ciyaalnimadii waan jeclaa, waanan ku hamiyi jiray inaan ka ciyaaro garoomada waawayn, waxaan ka bilaabay ciyaarista kubada cagta garoonka (M.A.ALI) ee dagmada Maxamuud Haybe, sanadku markuu ahaa 1997kii oo ku beegnayd markii laga soo noqday dagaalkii sokeeye
S:macno ahaan maxay kuugu fadhidaa kubada cagtu?
J: waxay iigu fadhidaa qiimo aad u wayn oo noloshayda waxay kaga jirtaa door muhiim ah, aad ayaan u jecelahay ciyaarista kubada cagta iyo daawashadeedaba, aadna waan u jecelahay dadka daawada ciyaaraha ee ciyaartoyda dhiiri-galin ku barbaariya dhalinta kubada cagta. Run ahaantii wali kumaa fikirin hadii aanan kubada cagta ciyaari lahayn waxa kale ee aan qaban lahaa, riyadaydu waxa kaliya ee ahayd waa kubada cagta.way ii soo dhawaysay oo waxay ii yeeshay magaca iyo sumcad aan ku dhex yeesho dhalinta kubada cagta iyo shacabka reer Hargaysa
S: Ma jiraa koox aad taageere u ahayd yaraantaadii, iyo ciyaartoy aad ku dayan jirtay in aad sidiisa oo kale u ciyaarto?
j: waxaan tageero u ahaa kooxda manchester united ee ka dhisan cariga ingiriiska, haddii ay dalkeena noqotana waxaan tageeri jiray kooxdaa NPP khaastan ciyaartoyga (Cabdi-Diito) waxaanuu ahaa ciyaartoy aad ay qanciso kubadiisu. Run ahaantiina Ilaahay siiyay farsamo uu wax ku qaban karo waa ciyaartoy wakhti kasta guul gaadhsiin kara kooxdiisa horumarna ku samayn kara koox. Diito iyo ciyaartoyga wayn ee reer brazil Ronaldo oo hada kubada cagta kaa sii baxaya ayay ahaayeen ciyaartoyda aan aadka u jeclaa inaan kaga daydo hanaanka iyo habka ay u ciyaaraan ,
S: Yaa kaa caawiyay in aad noqoto ciyaartoy magac ku leh kubada cagta Somaliland, gaar ahaan magaalada Hargeysa ee aad ku barbaartay?
j: waxa igu dhiiri galiyay ciyaarista kubada cagta C/qaadir Warsame oo ku magac dheer cabdiqaadir (Afay) oo ahaa ciyaartoy u ciyaari jiray kooxdii waynayd ee Nuuradiin kuwaas oo ahaa koox magac iyo muuqba ku leh kubada cagta ee dalkeena .c/qaadir oo ahaa coach ka kooxda aan ka tirsanaa ee Marooko oo ahayd kooxdii ii suurto galisay in aan sumcad ku yeesho kubada cagta
S: Boos-ciyaareedka aad ka ciyaartoy noo sheeg, iyo ka aad ugu jeceshahay inaad ka ciyaarto?
J: Runtii C/qani ilaa ciyaalnimadii waxaan aan caan ku ahaa inaan ka ciyaaro weerarka khaastana lamberka sagaalaad( 9). Waxa kale oo aan jeclaa inaan ka ciyaaro dhinac baalaha ee weerarka gaar ahaan nembarka 7 aad walina kama aan ciyaarin number aan ahayn labadaa boos. Waayo waxaan ku caan baxay inaan goolal dhaliyo kooxdaydana guul u horseedo kana caawiiyana in ay kooxaha dhexdooda magac ku yeeshaan khaasatan kooxdii aan ka bilaabay kubada cagta Marooko oo aan hormood u ahayn aniga iyo Siciid Cali aw Muuse oo ku magaca dheer Siciid Vieara hadana u ciyaara kooxda Gaashaan
S: ciyaartoydee jeclaan lahayd in aanay garabkaaga maqnaan marka aad garoonka ku jirto oo aad wada safataan?
J: Run ahaantii waxaan soo maray kooxa kala duwan sida, Marooko, Socso, SDF, Al-Najax iyo Gaashaan. Hadaba ciyaartoyda aan u jecelahay inaan mar kasta agtooda ka ciyaaro waxa igu wayn ciyaartoy Siciid Cali Muuse Viera oo ah laacib ku siinaya dhiiri galin iyo jaanisyo aad ku dhalin karto goolal ahna ciyaartoy aan ilaa ciyaalnimdii isku koox ahayn waxa naga dhaxaysay isfahan wayn aniga iyo Siciid, ciyartoyga Hargaysa ka ciyaara oo dhan way ogyihiin xidhiidhka iyo sidaan isku fahano aniga iyo Siciid marka garoonka aan ku jirno waxaan awoodnaa inaaan koox guul gaadhsiino una horseedno inay koobab qaadaan dhanka kale waxa isna aad aan u jecelahay inuu iga ag ciyaaro ciyaartoyga wayn ee Cumar Henry oo ah nin aan sxb aad u nahay iyo ciyaartoy da'yar oo ka ciyaara kooxda Al Hilaal ee ka dhisan dagmada Maxamuud Haybe oo lagu magaacabo Cabdicasiis (Dhasha) oo ka ciyaara difaaca
S: Bal wax nooga taabo guulihii aad la gaadhay kooxda Gaashaan ee aad ka tirsanayd iyo kooxihii ka horeeyayba?
J: Run ahaantii kooxda Gaashaan nasiib uma aan yeelan inaan lagaadho guulo waayo markii aan ku biirayba waxaan u soo ambabaxay dhinaca india oo aan u soo aaday waxbarsho Gashaan waa koox aad u fiican ciyaartoy aad u fiican ayay haystaan oo guul gaadhsiin kara kooxda, waxaan kooxda Alnajax markii aan ku soo biiray kula guulaystay koob munaasibad ahaa oo aan ka qaadnay kooxda White Sand Village ciyaartaas oo ku dhamaatay 4-2 waxa aan dhaliyay 2 gool oo ka mid ah goolasha aan ku qaadnay koobka
S: Wadanka Hindiya ee aad waxbarashada u tagtay waxa nagu maqaalo ah in aad naadi u ciyaarto Hindi ah bal arrintaa nooga waran?
J: Haa sidaad hadalka u dhigtay waxaan u ciyaaraa koox Hindi ah oo lagu magaacabo Milan boys ahna kooxda ugu fiican magaalada Aurangabad ee gobolka Mahrashtra waxa kale oo ay ku jiraan horyaalka dalka india waana koox koobab badan ku soo guulaysatay, waxa aan safar ciyaareed u raacay ilaa dhawr magaalo sida (Beedh, Jalna, kuwaas oo ay ka socdeen tartamo ciyaareed oo ay isku arkayeen kooxaha india ugu fiican sida Mahindra united iyo ,RCFbomay oo ah laba kooxood oo ka ciyaara championka asia
S: Maxaa guulo ah oo aad ka gaadhay ciyaaraha intii aad xagaas joogtay?
J: Guulo aad u waawayn ayaan ka gaadhay oo ii sababtay inaan hindiya magac ku yeesho. Waxa farxad ii ahayd markii aan qaaday gooldhalinta gobolka Aurangabad iy ciyaartoygii ugu wanaagsanaa tartankaas waxaan gooldhalinta ku qaaday 15gool waxan lay siiyay lacag dhan 100$ iyo jaa'iisado ay ka mid yihiin bestplayer award oo aan mutaystay in aan lay siiyo .,waxa kale oo aan u ciyaaray college ka wayn ee india caanka ka ah kama mid ah college yada ugu wayn india ee AZAAD COLLEGE dhalinyarta india oo dhan ayaa garanaysa kuwa dhamaystay oo hada wadanka jooga iyo kuwa india joogaba ,waxaan u soo qaaday koobkii jaamacad BAMU oo ay ugu dambaysay sandkii 2000kii ,oo aan anigu nasiib u yeeshay inaan guul u so hooyo waxaad arki kartaa marka ay ardayda ajaanbaka ahi collegeka soo galaan waxa ay isha ku dhuftaan sawiradayda oo ku dhajisan collegka gidaaradiisa iyo xafiiska maamulaha college ka tartankaas oo aan kaalinta labaad galay gooldhalinta laakiin an ku guulaystay inaan noqdo best player isagana
S: Sideey kuu arkeen awoodaada ciyaareed ajaanibka aad sheegtay in aad u ciyaarto?
J: Run ahaantii c/qani hindida soomalida ayaa kaga fiican ciyarista kubada cagta ,waayo maaha xiisohooda koowaad kubadcagta ee waxay ciyaaraan circket oo ah kubad ay ku ciyaara budh taasina waa ta iga caawisay inan iyaga dhexdood ka yeesho magac wayn iyo qadarin ,hadii ay kuu gartaan ajaanbina way ku soo dhawaynayaa waa dad aad u fiican oo aan ku dhibayn markastan jecel inaad la joogto . waxay ii arkaan laacib aad u wayn oo waraysiyo badan ayay ila yeesheen saxaafadoodu
S: Bal ka waran isfahamka idiin dhexeeya ciyaartoyda iyo tababaraha aad la shaqayso, iyo kuwii hore ee aad Somaliland kaga timi?
J: waxa noo dhexeeya isfahan wayn run ahaantiina waan jecelahay inaan la ciyaaro wakhti kasta ,tababaraha iyo kabtanka waxa naga dhexeeyay xidhiidh wayn iyo laacibiinta kooxda ,waxaan jecelahay inaan mar kasta ka ag ciyaaro sida laacibka ,,,Nadiim...wasiim....junied ....ropert ....mika iyo mike
S: Sidee ula qabsaday kubada cagta ee laga ciyaaro Hindiya adiga oo noo iftiiminaya?
J: Hindidu waxay ciyaaraan kubad aad u adag oo raf ah, dhibaatooyin badan ayaa kaa soo gaadhaya intaan ciyaaray waxa iga soo gaadhay naber iga gaadhay ilkaha waxaan dhawac ahaa ilaa muddo bil ah oo aan ka fadhiyay ciyaaraha
S: Maxaa kugu kelifay adiga oo wadanka aad joogto Waxbarasho u doontay in aad ciyaarista kubada cagta ku ladho waxbarashadaada?
J: runtii waxa igu kalifay xiisaha iyo jacaylka aan u qabo kubada cagta waan shayga koowaad ee aan balwada ka dhigtay
S: Sidee ayaad u aragtaa rajada ciyaaraha Somaliland?
J: Walaahi hoos u dhaca wayn ayaa ku yimi. Khaasatana wixii ka dambeeyay 1997 markii ay ciyaari jireen kooxaha Hrerstar, NPP, NDC iyo Sooyaal, markaas ayay ciyaaruhu xiiso lahaayeen, kubada cagtana hadda xiisihii wuu ka guuray dalkeena, dalkeena waxa lagu odhanayaa iska daa kubada, adiga oo nin wayn ah ayaad boodh dhex bood-boodaysaa!! Ma kharash ayaa kugu soo galaya, maxaad ka helaysaa, taas sababteeduna waa Wasaarada ciyaaraha iyo maalqabeenada wadanka oo dhalinyarada dhiiri-gelin siin waayay.S: Maxaad ugu dambayntii adiga oo fursadan uga faa’iidaysanaya ciyaartoyda ku akhrisanaya u soo jeedin lahayd?
J:Waxaan ugu baaqi lahaa dhalinyarta kubada cagta ciyaarta inay sii wadaa ciyaarista kubada cagta oo ay sii xoojiyaan kaalinta ay kaga jirto dalkeena kubada cagtu, iyagoo dhinaca kalena aan isku ilabaayn kubad kaliya ee waxbarashadooda wadanaya.Waayo qof kastaa waxa uu ku hamiyayaa inuu heer gaadho mustaqbalna yeesho, waxaan odhan lahaa ha isku ilaabina kubad kaliya ee waxna dhigta
Cabdiqani Xuseen Baynax, somalilandsports.net