Cicinho: “Waan ku soo murugooday kooxda Real Madrid” Ciyaaryahanka Khadka difaaca uga ciyaara kooxda Roma, Cicinho ayaa sheegay inay xaalad adag tahay kulanka ay Real Madrid isaga horimanayaan tartanka Championka, isaga oo kooxdaas hore uga tirsanaan jiray. Kulankan Roma iyo Real waxa uu ka mid yahay kulamada ugu adag ee sida wayn loo wada sugayo, waana kulanka ugu horeeya isreeb-reebka koowaad ee tartankaas. Waxa uu kulankani si gaar ah u saamaynayaa laacibka u dhashay wadanka Brazil ee Cicinho, kaasoo kooxda Real Madrid uga soo wareegay Roma Xagaagii la soo dhaafay. “Runtii waa Kulan adag. Waxaanse aaminsanahay inay labadayada kooxoodba ka si wada jir ah uga siman yihiin dareenka ah in aanu adag nahay. Real waxaan rabaa in aanu karbaashno, waayo halkaas aniga cadaadis ayaa igu haystay. Aad bay ii farax-gelinaysaa inaanu ka adkaano.” Ayuu yidhi Cicinho. Waxa kale oo uu tilmaamay inaanu ku farxin Real Madrid. “Kumaan faraxsanayn Real. Aad baan uga murugoodaa, sababtoo ah bilowgii xilli-ciyaareedka tababare Schuster Bernd waxa uu igala hadlay inuu igu bilaabo xilliciyaareedka, waxaana uu ii sheegay in aanu I ciyaarsiinayn. Sababtoo ah wuxuu iga door-bidayay Sergio Ramos.” Sidaas ayuu caddeeyay Cicinho, isaga oo hadalkiisa sii watana waxa uu intaa ku daray oo yidhi: “Waxaan la hadlay Gabadhayda, Aabahay iyo Hooyada, xataa goolwale Alexandre Doni iyo ciyaartoyga kale oo Brazil u dhalatay, kana ciyaara Roma, ka dibna waxaan gaadhay go’aankaygii aan ku imi Roma” Casillas oo sheegay inaan la barbar-dhigi Karin Buffon Xiddiga goolka kubada uga ilaaliya kooxda Real Madrid, Iker Casillas ayaa sheegay in aanay suurto-gal ahayn in la yidhaahdo keebaa fiican Gianluigi Buffon iyo isaga marka laga hadlayo qaabkooda xirfadeed ee goolwalenimada. Waxa jirta khilaaf ka dhex-taagnaa dhinacyada saxaafada Talyaaniga iyo ta Isbaanishka, taasoo ay ku qaadaa-dhigayeen bal kooda noqonaya goolwalaha dunida ugu fiican Casilas iyo Buffon."Shan Goolwale oo isagu (Buffon) ku jiro ayaa ugu wanaagsan Dunida, kuwaasoo kala ah: Buffon, Reina, Palop, Cech, iyo Van der Sar,” Sidaas waxa uu u sheegay goolwalaha Real Madrid Wargeyska ciyaaraha ka faalood ee ka soo baxa Talyaaniga, laguna magacaabo Gazzetta dello Sport. Isaga oo hadalkiisa sii watana waxa uu intaa raaciyay oo daba dhigay: “Yaan lays kaaya barbar-dhigin aniga iyo Buffon. Waanu kala qaab duwanahay, xataa xagga awoodda jidh ahaaneed.” Casillas waxa sidoo kale la waydiiyay maqnaanshaha xiddiga ay isku wadanka iyo kooxdaba yihiin ee Raul dhinaca Qaranka, waxaana uu arrintaa kaga jawaab bixiyay: “Raul looma yeedhin oo tababaruhu uma yeedhin, waana uu ku jiraa foomka magacyada, sidaa daraadeed lama ogaan karo waxa dhacay.” Ugu dambayntii Casilas waxa la waydiiyay adkaanta difaacooga oo kala ah: Sergio Ramos, Pepe, Fabio Cannavaro iyo Gabriel Heinze, waxaana uu ku jawaabay: “Waxaanu haysanaa difaaca ugu adag adduunnka sidaan fikrad ahaan qabo, kuwaasoo khibrad iyo firfircooniba isku darsaday iyo waliba degenaan.” Ayuu hadalkiisa ku soo gebo-gabeeyay. Real Madrid waxay kulan adag oo ka mid ah ciyaaraha loogu tartamayo Horyaalka kooxaha Yurub ee champion-ka  isaga horimanayaan kooxda Talyaaniga ah ee Roma oo iyadu marti ahaan loogu tagayo garoonkeeda Olampico.