Cassano: “Sampdoria Dumarkeedaa qurux badan” Xiddiga kooxda Sampdoria, Antonio Cassano ayaa caddeeyay sababta ka dambaysa joogitaankiisa halkaas ee xilli-ciyaareedkan, waxaana uu ku tilmaamay inuu ka helay dumar wanaagsan magaalada Genoa. Ciyaaryahanka oo hore uga tirsanaan jiray kooxda Roma waxa dib u soo codsatay inuu ugu soo laabto kooxdiisii hore iyada oo beryaha hadal-haynteedu ku badnayd bilihii la soo dhaafay, waxaana ay kooxda Roma ciyaaryahankan si dhab doonisteeda u caddaystay ka dib markii kooxdiisu todobaadkan gudihiisa 2-0 kaga adkaatay  naadiga Napoli. Cassano waxa uu ku caan-baxay awood dabiici ah oo qayru-caadiya, haddaba mar wax laga waydiiyay bal sida la yaabka leh ee uu ugu qanacsan yahay naadiga uu hadda la joogo waxa uu yidhi: “Runta markaan sheego ma doonayn in aan u wareego Sampdoria. sababtoo ah waxaan u sheegay inay tahay inay tahay caasimad dhimatay.” Sidaas ayuu yidhi Cassano. “Haddiise aan ka waran waxa aan hadda ula qabsaday ee xadhaha ii adkeeyay, waxaan ku yeeshay saaxiibo fiican, iyo waliba dumar fara badan oo aad u wanaagsan, arrintaas oo aniga si fiican ii qancisay, iina gaar ah.” isaga oo sii jilcinaya arrintaas waxa uu intaas ku daray oo yidhi: “waxa naloo ogolaadaa in aanu hablaha xagga sare ugu tagno ka hor inta aanay ciyaartu bilaabmin, qolka ayay noo soo raacaan dhar xidhashada, meel kastana waad kula kulmi kartaa.” Sidoo kale waxa uu Cassano ku baaqay inuu ku negaanayo kooxda Sampdoria oo aanu ka tagayn, waxaana uu aaminsan yahay in kooxdiisu ku guulaysan karto horyaalka sanadaha soo socda. Ciyaaryahankan oo da’diisu 25 jir tahay waxa uu ka hadlay dedaalkiisa dhinaca wax qabadka kooxda: “Waxaan ku idhi Gudoomiyaha kooxda ha lay kordhiyo mushaharkayga, si aan dedaal u sameeyo.” ayuu hadalkiisa ku soo gunaanaday.  Mancini oo taageerayaal gadoodsani weerareen Taageerayaal gadoodsan ayaa damcay inay gacan-saaraan tababaraha kooxda Intermilan, ka dib markii ay kooxda Liverpool 2-0 ugu quus-goysay ciyaar ku tiirsanayd wajiga hore ee tartanka horyaalka kooxaha Yurub (Champion-ka). Markii kulanku dhamaaday ayaa tababaraha oo isaga laftiisu ka niyad-jabsanaa kulankaas natiijadii ka soo baxday isaga oo fekeraya ay candhuuf wajiga kaga tuftay gabadh xidhnayd funaanada midabkeedu isugu jiro madow iyo buluuga ee ay kooxda Inter ku ciyaarto. “Ma garanayo sababta ka dambaysay inay gabadhi i candhuufayso, waxaabase ka darnaa taageerayaal ku sheega layga hayay ee damacsanaa inay I fara-saaraan.” Sidaa waxa yidhi tababaraha Intermilan oo TV-ga layska arko ee CNN qaybtiisa ciyaaraha uga waramayay dhacdadii la kulantay. “Waxa iga qab-qabtay ilaaladayda gaadhka oo ka dibna la hadlay booliska Anfield iyo ciidamada amniga, kuwaasoo kala didiyay taageerayaasha. Maan filayn dhaqan-xumada ay igula kaceen taageerayaashu, iyaga oo joogo dal ajnabi aan ku nahay.” ayuu yidhi isaga oo hadalkiisa sii watana waxa uu intaa raaciyay: “Waa wax fool xun oo laga khajilo waxay sameeyeen.” ayuu yidhi isaga oo madaxa lulaya. “Waxa ka daraa waxay ku kaceen cayda iyo aflagaada ay ii gaysteen. aniga laygama guulaysan ee waxa laga guulaystay oo kooxda aanu ka wada midka nahay taageerayaasha mana garanayo sababta ay aniga waxaas igula kaceen.” ayuu mar kale ku calaacalay tababare Mancini. Kooxda Intermilan waxay hogaanka u haysaa horyaalka Talyaaniga, halka ay Liverpool horyaalka Ingiriiska u dhawayn caynaanka hogaankaas. waxayse khibrad la yaab leh u leedahay sida loo karbaasho kooxaha ka soo qayb-gala tartanka horyaalka kooxaha Yurub ee Championka loo yaqaano. Capello: “Ronaldaa ka wanaagsan V. Basten” Tababaraha Xulka Ingiriiska Fabio Capello, ayaa ka hadlay xaalada ciyaaryahanka uu tababaraha u ahaan jiray ee Ronaldo iyo waliba Alessandro Del Piero, kuwaasoo uu tilmaamay in labadoodaba uu ka dhexeeyay xidhiidh wanaagsani. Hadalkiisani waxa uu ku soo beegmay xilli uu Ronaldo dhakhtar Faransiiska ku yaala u jiifo qalliin lagaga samaynayo jilibka, kaasoo uu ciyaaraha kaga maqnaanayo muddo Laba iyo Toban bilood ah. haddaba mar uu ka hadlayay Fabio Capello arrinta Ronaldo waxa hadaladiisii ka mid ahaa: “Si lama filaan ah waxaan u arkay toos, arrinta Ronaldo, aad baanaan uga murugooday oo uga xumaaday.” waxaana uu hadalkiisa raaciyay: “Wixii laga yidhi arrintiisa oo dhan wuu mutaystay mana garanayo waxaan ku daro. waan ka xumahay yaanaan kala masuugin waa ciyaartoygii ugu wanaagsanaa ee aan abidkay tababare u noqdo, xataa marka lagu daro laaciibkii la yaabka lahaa ee Marco Van Basten isagaa ka wanaagsanaa.” Capello sidoo kale waxa uu niyada u dhisay laacibkan dhaawaca u jiifa: “Nasiib daro waa dhaawac khatara, waana inu si adag u shaqeeo si uu u soo laabto. waan rajaynaya inuu sidaas samaynayo, waayo ciyaartoyga sidiisa oo kale ah kubada cagta muhiim buu u yahay, waa inuu dedaalaa si uu u soo kabto.” ayuu ku booriyay Capello laacibka wayn ee reer Brazil. Sidoo kale waxa uu isna la hadlay ciyaaryahanka Alessandro Del Piero oo ay xidhiidh kulul iyo mid qabawba leeyihiin tababarahan: “Del Peiro waa ciyaaryahan kale wayn, waxa uu si fudud ula qabsadaa ulana shaqeeyaa laacibiina naadiga ku cusub oo uu soo dhaweeyo. Ma garanayo sababta uu tababaraha Claudio u cadaadinayo ciyaaryahankaas.” ayuu yidhi Capello.  Ramos:“Way rumowday riyadaydii Wembley” Tababaraha naadiga Tottenhamm Juande Ramos ayaa caddeeyay in kulanka ay koodiisa isaga horimanayaan kooxda Chelsa ee Faynalka koobka Carling Cup-ka loo yaqaano yahay kulankii ugu muhiimsanaa ee uu intii uu xirafada tababarenimoku shaqaynayay. Ramos waxa uu ku caanbaxay ku guulaysiga koobabka tartamada intii uu la joogay kooxda Isbaanishka ah ee Sevilla, isaga oo faynalkii ugu horeeyay gaadhsiiyay kooxda Tottenham oo uu gacanta ku yahay muddo gaaban oo dhowr bilood ah. Waxa uu ku guulaystay Ramos UEFA Cup-ka iyo koobka boqorka. waxa uu haddaba ka hadlay sida uu ugu riyooday kulankan: “Aniga shakhsiyan riyo ayay ii tahay in aan ka ciyaaro gegida caanka ah ee Wembely, waa tartankii ugu waynaa ee aan faynalkiisa ciyaaro intii aan tababaraha ahaa.” Sidaa waxa uu Ramos u sheegay Wargeyska Daily Mail. "Ma qiimayn karo arrintan, waxay I tusinaysaa sida aan ugu raaxaysanayo uguna faraxsanahay shaqada kooxda iyo taageerayaasha iyagaan halkan na soo gaadhsiyay.” ayuu ku celiyay tababaraha Tottenham.    Cabdiqani Xuseen