Ma Dhabaa Ronaldo ayaa ka wanaagsan Kaka
Ciyaaryahanka ugu goolasha badan horyaalka Ingiriiska, Cristiano Ronaldo ayaa ka dib kulankii u dambeeyay ee kooxdiisu hogaanka ku qabtay oo uu laba gool u dhaliyay. Siyaabo kala duwan loogu ammaanay dedaalkiisa. Waxaana shakhsiyaadkii ammaanta kula dul-dhacay ka mid ahaa.
Tababaraha naadiga Portsmouth, Harry Redknapp ayaa isna aad u ammaanay weeraryahanka Crist. Ronaldo oo uu ku tilmaamay nin u qalba xiddiga adduunka.
Weeraryahankan Boortaqiiska waxa uu jabiyay rikoodhkii uu u dhigay ciyaaryahankii hore ee Manchester United George Best oo isagu 32 gool u dhaliyay kooxda Manchester United xilli-ciyaareed qudha. Waxa uu Redknapp waxa uu ku war-geliyay tabarare Ferguson inuu haysto xiddiga adduunka ugu fiican.
Tababarahan oo ku dheeraaday ammaanta laacibka ay isku dalka yihiin waxa hadaladiisa ka mid ahaa. “Waxa uu si la aan suurtogal ahayn u dhisay qaabkiisa farsame oo maamulkiisa kubadeed waxa uu ka turjumayaa inuu yahay laacibka hadda adduunka ugu fiican, mana arko ciyaartoy la nooc ah. Khibradiisa gaarka ayaa xusid mudan iyana inuu yahay ciyaartoy maskax fiican. Kaka waa ciyaartoy caalami ah. Balse waxaan qabaa in Ronaldo ka fiican yahay. Ma sahlana ciyaaryahana liiga ku hogaaminaya 24 gool iyada oo aan wali xilli-ciyaareedkii dhamaan.”
Ciyaaryahanka ay Ronaldo isku kooxda yihiin ee Scholes, ayaa isna faalo ka bixiyay saaxiibkii isaga oo tilmaamay.: “Ronaldo waxa uu gaadhsiin karaa tirada goolashiisa inta ka hadhsan horyaalka Afartan gool.” Sidaa waxa yidhi ciyaaryahanka kooxda Manchester United ee ay isku naadiga yihiin Ronaldo. “Waxa kale oo uu haystaa fursad u haystaa inuu ka faa’iidaysta inta cagtiisa ay ku jirto kubadu, si uu dhakhso u noqdo xiddiga Yurub iyo ka adduunkaba. Runtii waa mid laysma waydiiyaan ah inuu u qalmo.
Jurgen Born: “Cidda Diego Rabtaa horta aniga ha I disho”
Gudoomiyaha kooxda Werder Bremen, Jürgen Born, ayaa gaashanka ku dhuftay in aanay suurto-gal ahayn in ciyaaryahankiisa khadka dhexe Diego ka tago kooxda marka uu dhamaado wakhti-ciyaareedkani.
Ciyaaryahankan khabiirka ah ee u dhashay wadanka Brazil, waxa lala xidhiidhinayay kooxo badan oo la xusay inuu u wareegayo. Sidoo kale kooxo kale ayaa iyana hoosta kala calaamadiyay rabitaanka iyo xiisaha ay u hayaan ciyaaryahanka. Juventus ayaa iyadu daaha ka furtay isla-markaana kulan la yeelatay laacibka laf ahaantiisa.
Kooxo kale oo Yurubta waawayn ah, oo ay ka mid tahay Real Madrid, ciyaaryahanka aabihii ayaa isagu Tilmaamay in Diego Rabo Real. Marka laga hadlayo horyaalka Ingiriiska Chelsea ayaa si wanaagsan isha ugu haysa xaalada ciyaaryahankan.
Isku soo wada duuboo, Gudoomiyaha kooxda Bremen ayaa isagu si buuxda u cadeeyay in aanay amuurahaasi waxba ka suurtoobayn. “Haddii cidi rabto Diego inay heshiis la gasho, horta ugu horayn waa inuu aniga idilaan.” Sidaa waxa uu Born u sheegay Idaacad Isbaanish ah oo lagu magacabo Onda Cero Radio. “Waxa uu nagula jiraa heshiis mudadii ku eg tahay 2011-ka, waana ciyaaryahankayaga noogu wanaagsan.” ayuu ku ladhay hadalkiisa.
Inkasta oo Diego Aabhii, oo sidoo kale wakiilkiisana ah uu caddeeyay shalay gelinkii hore in xiddiga Xulka Brazil uu ku faraxsanahay inuu u wareego kooxda Real Madrid. Hadana, Born waxa uu caddeeyay in aanay kooxda Madrid waxa xidhiidh caalami ah la samayn. “Real Madrid ilamay soo hadal” ayuu yidhi Gudoomiyaha Bremen.
Adebayor: goolashii ma waxay ka raaceen xiiriddii timihiisa?
Weeraryahanka kooxda Arsenal ee Emmanuel Adepayor, ayaa hadda iska jaray timihiisii Tidcanaa. Waxaana wararka laysla dhexmarayoo ee ra’yul-caamka bulshada u dhuun-daloosha, isla-markaana ka faalooda ciyaaruhu qeexeen in markii uu jaray timaha ay ku habsatay abaar dhinaca gool la’aanta ah. “Timihii marka uu xiiray ayuu seegay goolashii uu dhalin jiray.” Weedhaasi waxay ahayd Hal-ku-dheg lagu cabirayay, isla-markaana lagaga faaloonayay gool-la’aanta la soo deristay laacibka Arsenal ee Adepayor muddoonkii u dambeeyay ee uu iska xiiray timihiisii dabnaa ee tidcanaa, intii ka dambaysay rikoodhkiisii gool-dhalinta ee ahaa 24 kulan oo uu ku dhaliyay 19 gool. Waxa ay isku daba socdeen tartanka gool-dhalinta xiddiga Saddexaad ee dunida Cristiano Ronaldoo oo isagu hadda leh 22 gool. Halka uu ka dhaafay Fernando Torres oo isagu yeeshay 20 gool. Waxaana uu Adepayor hadda wali haystaa 19-kiisii gool ee hore/
Kooxdiisa Arsenal waxa laga adkaaday Hal kulan, waxa ay barbaraysay Afar kulan horyaalka Ingiriiska ah, halka ay ka guulaysatay 18 gool waana kooxda ay horyaalka Ingiriiska isku eryanayaan naadiga Manchester United. Horyaalka Champion-ka ayay u soo baxday wareega Sideeda iyada oo karbaashtay AC Milan, isla-markaana waxa ay isku beegmeen Liverpool. Waxa ay ku guul-daraysatay Carling koobka loo yaqaano iyo FA Cup-ka.
Adepayor waxa uu sheegay in hadalada ka soo yeedhay taageerayaashiisu ay cadho ku riday. “Neefis bay igu rideen. Waxa ay rabaan in aad mar kasta gool-dhaliso. Umana muuqato taageerada aan siiyo ciyaartoyda aan isku kooxda nahay. Waa hubaal in aanaan goolal dhalin. Balse caawintaydii ciyaartoyda kooxdu waa %100. muhiimadda koowaadna waa in kooxdu guulaysato.” Ayuu yidhi Adepayor.
Huntelaar oo raba inuu ku biiro kooxaha waawayn
Weeraryahanka kooxda Ajax, Klaas-Jan Huntelaar ayaa u sheegay wargeyska Sport Week in marka uu ka tago naadiga Ajax uu rabo inuu ka mid noqdo oo ku biiro mid ka mid naadiyada ugu heerka sareeya Qaaradda Yurub.
Ciyaaryahankan oo da’diisu tahay 24 sano, waxa uu sheegay inuu ku hamiyayo horyaalada premiership-ka, waxase uu daba dhigay inuu ka fiirsanayo kooxda uu ku biirayo.
"Heshiiskayagu waxa uu dhamaanayaa 2011-ka. Koox aanu heshiis dhab iyo wada xidhiidh qayaxan yeelanayna ma jirto.” Ayuu yidhi Huntelaar. Waxaana uu hadalkiisa raaciyay. "Aniga ayaa go’aansaday inaan ka tago, Ajax-na way tix-gelinaysaa go’aankayga, fursadna way ii siinaysaa aan ku tago halka aan rabo,”
Ma uu caddayn halka uu u warageeyo iyo kooxda uu u digo-roganayo. “Marka kasta oo aad doonayso in aad cid heshiis la saxeexato waa inaad eegaataa naadigaas awoodiisa.” Ayuu isaga oo sharaxaad arrinta ka sii bixinaya, siina jilcinaya waxa uu raaciyay. “Waxaan jecelahay in aan ku biiro koox wayn oo awood badan.”
Kormeerkii dhakhtarka Qaranka Arjantiin ee Messi iyo natiijadii ka soo baxday
Ciyaaryahanka kooxda Barcelona ayaa lagu rajo-wayn yahay inuu bil ka dib ku soo laabto gegida ciyaaraha ee kooxdiisa, haddii rajada dhaawaciisu u sahlanaato sida la filayo.
Ciyaaryahankan wadanka Arjantiin u dhashay waxa dhaawacu asiibay kulan ay wada yeesheen kooxda Celtic oo ku tiirsanaa tartanka horyaalka kooxaha Yurub ka hor dhowr todobaad.
Maalintii Arbacada ayay kormeereen Dhaakhtiir ka socotay wadanka Arjantiin, waxayna kala kulmeen xaalad fiican oo ay sheegeen in ciyaartoygu ku sugan yahay.
Madaxa Dhaakhaatiirta Xulka wadanka Arjantiin oo lagu magacaabo Homero D’Agostino ayaa caddeeyay inuu rumaysan yahay in dhaawaca Messi ay suurto-gal tahay inuu ka soo kabto oo ku soo laabto gegooyinka dhamaadka bisha April. “Waanu tijaabinay dhaawaciisa, waxaanay u eg tahay inuu si fiican u soo ladnaanayo.” Sidaa waxa yidhi Dhakhtar D’Agostino. Isaga oo hadalkiisa sii watana waxa uu intaa raaciyay oo yidhi: “Waan wanaagsan yahay. Dhaawaca hore oo ku soo laba kacleeyay mooyaane, kii cusbaa wuu ka ladan yahay. Dareenkiisu wuu fiican yahay in badana ma oolayo sariirta. Wuu bilaabi doonaa shaqda si dhakhso leh.waxaanaan filayaa inuu Lix todobaad oo keliya uu qaadnayo dhaawaciisa misigtu.” Ayuu dhakhtarku hadalkiisa ku soo koobay.
Taageerayaasha kooxda Barcelona ayaan iyagu maqli Karin wararka sheegaya in laacibkoodan ay sida wayn u jecel yihiin muddo dheer ka maqnaanayo gegooyinka lagu ciyaaro, waxayna rajaynayaa inuu si dhakhso leh ugu soo laabto.
Cisse oo caddeeyay inuu ku soo laabanayo Liverpool
Weeraryahanka kooxda Faransiiska ah ee Marseille, Djibril Cissé ayaa qiray inuu xiisaynayo ku laabashada kubada cagta ee horyaalka Ingiriiska. Waxaana uu qorshiisa ku darsaday inuu u ciyaaro kooxdiisii hore ee Liverpool mar labaad.
Weeraryahankan hore uga tirsanaa Liverapool khibrad fiican kamuu helin intii uu wakhtigiisa ku qaatay kooxda Liverpool. Waxaana intaa ka dib iibiyy tababare Rafa Benitez oo isu dhaafiyay dhinaca naadiga Marsielle iyo horyaalka Faransiiska uu u dhashay, isaga oo lagu fasaxay lacag dhan 6 Milyan oo Yuuro ah Xagaagii la soo dhaafay. “Waxaan u hiloobay Ingiriiska. Sababtoo ah waa mid run ahaantii ay haboon tahay in laga ciyaaro gaar ahaan kooxdaydii hore ee Liverpool.” Sidaas waxa yidhi Xiddiga Faransiiska ah ee Cisse.oo intii uu joogay Horyaalka Premiershipka ragaadiyay dhaawac soo gaadhay. “Dabcan waan jecelahay inaan ku laabto horyaalka Premier-ka. 100% waan ku rajo waynahay inaan ku laabanayo. Markii aan halkaa joogay (Ingiriiska) waxaan ka jabay Lug, manaan helin fursad aan isku muujiyo.” Ayuu yidhi isaga oo ka hadlayay marxaladii uu ku sugnaa markii uu joogay gegida Anfield.
Cisse waxa ka mid ahaa ciyaartoydii gegida Anfield ku karbaashtay kooxda Liverpool kulankii ku tiirsanaa hortaantii tartanka horyaalka kooxaha Yurub sanadkan.
Xulka Qaranka Mexico oo danaynaya tababare Scolari
Saxaafada Qaarada Waqooyiga Ameerika ayaa tibaaxay inay Luiz Felipe Scoari uu yahay mid ka mid ah tababareyaasha laga yaab in loo magacaabo Tababaraha Xulka Qaranka Mexico.
Tababarahan Qaranka Brazil u qaaday koobka dunidu, waxa uu ilaa sanadkii 2003-da laylinayay Qaranka wadanka Boortaqiiska. Waxaana lagu wadaa in ka dib tartanka Qaramada Yurub ee 2008-da uu tababarahina heshiis cusub la galay Boortaqiiska ama ka huleelo.
Hugo Sanchez ayaa si wayn isaga loogu soo dhaliilay shaqadiisa intii uu tababaraha Qaranka Mexico ahaa.
Tababarayaasha kale ee Xulka Qaranka Mexico in loo magacaabo liiska loogu daray waxa ka mid ah Odayga Talyaaniga ah ee ku guulaystay koobkii dunidee u dambeeyay Marceli Lippi, Ninka kale ee Arjantiiniga ah ee lagu magacaabo Carlos Bianchi ayaa isna sidoo kale lala xidhiidhinayaa. Nin ganacsade ka ah, isla-makraana Afar naadi oo Mexica-aan ah iska leh, isla-markaana lagu magaacabo Jorge Vergare ayaa isna shaaca ka qaaday inuu door-bidayo oo hunguraynayo inuu noqdo tababaraha cusub ee Mexico.
cabdiqani Xuseen Baynax
