MUQDISHO: Xiriirka kubadda Cagta ee Soomaliya ayaa suurtageliyey qabsoomida tartanka kubadda cagta ah kaasi oo u dhexeeya ilaa 8 dugsiyadda gobolka banaadir,isla markaana lagu maamuusayo 21-ka November oo ah maalinta macalinka Soomaliyeed.

Xafladii furitaanka ee kulankii ugu horeeyey tartankaasi  ka bilowdey garoonka Dugsiga sare ee booliska oo ay ka soo qeybgaleen madaxda xiriirka kubadda cagta, madaxda Dalladaha waxbarasho ee gobolka banaadir iyo mas`uuliyiin ka socotay shirkada isgaarsiinta ee Nationlink , ayaa waxaa  ka hadlay guddoomiyaha xiriirka kubadda cagta Siciid Maxamuud Nuur [Mugaanbe] isaga oo sheegey muhiimadda uu leeyahay tartanka dugsiyada gobolka Banaadir iyo xuska munaasabadda maalinta macalinka wuxuuna ciyaartoyda ka qeyb galeysa tartankaasi kula dardaarmay inay muujiyaan asluub wanaag iyo ciyaar ay farsamo ku dheehantahay.

Guddoomiyaha xiriirka kubadda cagta Siciid Maxamuud Nuur [Mugaanbe]ayaa waxaa uu ugu danbeyntii ciyaartoyda dugsiyada ee ka qeyb galeysa tartankaasi u balan qaaday in xiriirku soo xulan doono ciyaartoyda ay tababarayaasha u arkaan in ay meteli karaan qaranka  iyada oo lagu dari-doono xulka under 17 ee Soomaliya.

Dugsiyada 8 ah ee ka qeyb galaya tartankaasi ayaa waxaa ka hor bilowgii tartankaasi  tababarayaashooda loo qabtay seminaar 2 maalmood socd\y kaasi oo ay casharo ka bixinayeen qabiiro ay soo xuleen xiriirka kubadda cagta kana dhacay xarunta Youth-link ee magaalada Muqdisho.

kulankii ugu horeeyey ee furitaanka waxaa wada yeeshay Dugsiyada Hoyga Xamar vs Al-mathell waxaana ay labada kooxood ay soo safeen ciyaartoy da'yar oo xirfado ciyaareed huwan taasi oo ay si weyn ugu riyaaqeen dhamaan daawadayaashii kulankaasi oo qaarkood sheegey in dugsiyadu ay ku jiraan xiddigo mustaqbal ku leh kubadda cagta Soomaaliya.

Kulankaasi ayaa waxaa uu ku soo idlaadey 1-0 oo ay guusha ku qadeen dugsiga Al-mathell dugsiyada kale ee ka qeyb galay tartanka waxaa ay kala yihiin Macalin jaamac,Al-macmuur,Jaabir-bin Hayaan,Abuu-xaniifa,Muqdisho iyo Macaarif.

Si kastaba ha ahaatee, waa markii ugu horeysey ee xiriirka kubadda cagta uu dugsiyada gobolka Banaadir u qabto tartan weyn oo ay ka qeybgalayaan ilaa 8 dugsi,waxaana mugdi ku jirin in dugsiyada laga heli karo ciyaartoy mustaqbal leh oo daafaca  magaca qaranka Soomaaliya, iyadoo ay qeyb ka tahay dadaalka uu xiriirka kubadda cagta iminka ku doonayo inuu dib boorka isaga jafo ka dib sanado badan oo aan la qaban tartamo gudaha ah xaaladda dalka awgeed.

 

 By  Zaciimka,
zaciimka02@hotmail.com